【Emily】重臨駐京辦 陳國基：格外親切

【明報專訊】政務司長陳國基周一（24日）先至隨政府及立法會大灣區考察團返港，噚日又再去北京訪問3日，佢到埗後第一站先去駐京辦，佢話去到時格外親切，因為佢之前喺入境處工作，2000年前後曾派駐駐京辦。今次重臨舊地，佢話最關心「搶人才」措施嘅反應。

陳國基引述駐京辦「招商引才專組」提到，香港對初入職場嘅內地院校畢業生有好大吸引力，畢業生普遍關心住屋、家人就業、仔女返學嘅生活問題。陳國基之後去清華大學，同在京求學嘅香港學生交流，仲鼓勵佢哋擔當橋樑角色，向內地同學好好推介在港發展嘅優勢和機遇，為香港引進更多高質人才。

同樣噚日去北京訪問嘅公務員事務局長楊何蓓茵亦同當地就讀嘅香港學生聚會，傾談間亦sell吓香港公務員工作，話歡迎佢哋畢業後投考公務員行列。