【Emily】財爺用麵砌笑面 迎「開心香港」 特首：最大工作動力係大家開心

【明報專訊】噚日特首李家超連同一眾官員包括財政司長陳茂波、行會召集人葉劉淑儀、文體旅局長楊潤雄等出席「開心香港」啟動禮。李家超致辭時話，「開心香港」同早前啟動嘅「你好，香港！」係相輔相成，希望用本港嘅活力加埋市民嘅笑容，向外說好香港故事。佢又話，作為特首最大嘅工作動力係見到大家開心，「如果特區政府嘅工作令到市民開心，我就好開心喇」。

李家超又話，留意到「開心香港」率先打頭陣嘅兩項活動，包括今日一連兩日喺會展舉行嘅美食市集同「全港戲院日2023」，市民反應都非常好，之後將舉行一系列嘅活動，期望配合之前派嘅首期消費券，可以帶動本地消費同振興經濟。

陳茂波致辭時就話，「開心香港」係希望大家「好玩好食，開心積極」，又話本港全面復常以嚟，留意到市面「積極開心咗」，又形容今年首季整體經濟有溫和增長，佢相信未來經濟形勢會愈嚟愈好。

啟動禮除咗有表演睇，陳茂波、副財政司長黃偉綸同民青局長麥美娟有一同上台，由中華廚藝學院代表教整麵，仲用整好嘅麵砌成兩個笑臉，氣氛相當開心。