【Emily】勞動節官員議員出帖講勞權進展 李家超感謝打工仔女貢獻國家

【明報專訊】噚日係五一國際勞動節，特首李家超同政務司長陳國基喺facebook發帖，話向所有打工仔女致敬。李家超話感謝各位辛勤付出同努力工作，為國家同社會繁榮發展作出重要貢獻；又提到《施政報告》多項改善勞工權益措施已經取得進展，包括增加職安健罰則修訂法例上月通過、取消強積金對冲亦會喺2025年勞動節生效。

李家超話，會同團隊繼續與勞資雙方就勞工議題坦誠溝通交流，協力讓廣大僱員得以分享經濟發展成果，達至勞資雙贏。陳國基就感謝勞工界同商界有商有量，和衷共濟，造就多項措施落實，加強保障僱員。

應對炎夏 食環掛腰扇派工友

食環署噚日就發稿話重視勞動人員嘅需要，連月特別檢視鄉郊地區前線清潔工嘅工作環境，採取措施確保佢哋可以方便地喺工作地段或附近搵到飲用水、酷熱天氣短暫休息地方、清潔工具用水及廁所。署方已於轄下所有分區潔淨組點名報到處張貼告示，列明便利設施位置。

食環署亦已向部門所有戶外清潔員工派發便攜式掛腰風扇，希望喺夏季為工友降吓溫。

勞聯立法會議員林振昇就喺社交媒體上載食午餐相片，話噚日起最低工資水平增至每小時40元，但食一餐晏都唔夠畀，促請政府盡快落實最低工資「一年一檢」安排。