【Emily】周末觀塘美食市集 張宇人話會busking

【明報專訊】政府推行「開心香港」活動，第三場「美食市集」會喺嚟緊嘅周末，即6月3及4日「特別日子」喺觀塘海濱「VESSEL發現號」舉行，不設門票，免費入場。行會成員兼立法會飲食界議員張宇人喺facebook預告，自己到時會busking（街頭表演）唱歌喎。

第三場美食市集有超過65檔，以美酒佳餚同亞洲美食為主題，市民可以喺觀塘海濱襯托下品嘗亞洲特色美食同埋美酒，到時仲會有多項表演、烹飪示範、兒童遊戲、大型「打卡」佈置。