經濟
辭超媒體聯席主席等 鄭志剛轉任藝術顧問
【明報專訊】新世界（0017）呢排好受股民關注，而公司執行副主席兼行政總裁鄭志剛（Adrian）都有新動向。超媒體控股（0072）噚日宣布，因為Adrian需要更多時間處理其他業務，已辭任非執董、董事會聯席主席、名譽副主席及首席戰略顧問職務，不過獲委任為藝術顧問；集團創始人邵忠將調任為董事會主席，繼續擔任執董及行政總裁職務。
翻查資料，其實Adrian今年2月16日先獲委任為超媒體控股非執董及董事會聯席主席，任期初步起計為期3年，有關委任可以由任何一方以不少於3個月書面通知終止，去到9月20日公布嘅中期報告仍顯示佢係非執董。不過9月20日之後Adrian新聞多多，包括新世界業績倒退兼減派息、大行狠劈目標價，又出任香港文學館主席等等，唔知係咪因為咁而令Adrian分身不暇？Adrian「入局」後，超媒體控股亦由無咩成交變成「Adrian概念股」，股價喺2月15日炒上，由0.37元炒到3月6日最高位1.97元，一共升咗超過4.3倍，不過之後就坐過山車咁接連急挫，8月31日曾低見0.216元，噚日收報0.27元，升17.9%，唔知今日又會點呢。
