【Emily】民建聯副秘 葉文斌fb中伏被呃3萬

【明報專訊】騙案猖獗，民建聯副秘書長葉文斌（Terry，圓圖）都中招。佢話舊年9月收到facebook（fb）信息，不虞有詐點擊懷疑釣魚網站連結，畀人盜用信用卡碌咗超過3萬元喺fb賣廣告。Terry批評fb至今未交代涉及嘅廣告內容，希望公開經歷提醒市民，仲話歡迎政府搵佢宣傳防騙。

Terry同Emily分享被騙經過，佢憶述當時收到疑似fb官方信息，通知佢戶口會被停用，佢點擊咗懷疑詐騙連結後，就被盜用信用卡喺fb賣廣告。佢話由於將信用卡綁定喺fb，加上平時一直有賣fb廣告，直至見到大額消費先知受騙。

Terry話已追回兩萬幾元損失，但批評fb無交代涉及嘅廣告內容，擔心如果涉及「光時」等信息，會對佢造成嚴重影響。佢話事後對fb失去信心，再無用fb廣告功能，雖然好難完全唔用fb，但會呼籲市民一齊轉用「小紅書」等平台。