【Emily】打鼓嶺過渡屋將竣工 議員指交通未傾掂

【明報專訊】由上屆政府提出嘅過渡房屋陸續完工兼入伙，身兼打鼓嶺鄉事委員會主席嘅立法會選委界別議員陳月明噚日同傳媒茶敘時透露，位於打鼓嶺、由博愛醫院營辦嘅過渡房屋「博愛昇平村」預計下月中竣工，但交通配套未傾掂，佢已向政府提出不同方案，例如增加現有巴士嘅班次、由博愛醫院營辦接駁巴士等，仲未有結論。

翻查資料，博愛昇平村有約601個單位，預計可住大約1000人，陳月明話，現時區內居民主要靠一條九巴線同一條小巴線接駁上水站，繁忙時間一向「迫爆」，香園圍口岸通關後更嚴重，希望政府同博愛醫院盡快落實交通方案。

稱北上消費潮礙北區雞場生意

此外，通關後唔少港人鍾意北上消費，陳月明話不止零售、飲食業會受影響，連帶北區嘅本地雞場都受影響，因為唔少打鼓嶺居民住得近口岸，所以不時去深圳買餸，搞到好多同雞場買雞嘅雞檔近月都拎少咗貨。