【Emily】57.1%青年認為會生育 1997年後新低

【明報專訊】青協青年研究中心噚日公布「青年價值觀指標2022」調查結果，認為自己會生兒育女同結婚嘅青年都有下降趨勢，當中前者嘅比率更係1997年以嚟新低，由1997年87.7%跌至57.1%；後者嘅比率連續5年維持喺八成左右。另有25.6%受訪青年認為自己人生觀係消極嘅，比率連續5年維持喺兩成半左右。中心認為，青年價值觀轉變同香港整體發展息息相關，但部分青年仍抱消極人生觀，令人憂慮，呼籲社會各界攜手開拓機會，強化青年自身建設，發揮正向能量。

中心喺前年12月1至18日以隨機抽樣方式，成功用電話訪問525個15至39歲青年，回應率51.8%。結果顯示，81.2%受訪青年覺得自己係有用嘅人，創4年來新高，但同2003年及2006年均有94.8%仍有差距。

另外，有37.7%受訪者對實施「一國兩制」有信心，比率連續4年超過30%；至於認為選舉投票有用嘅就有40.2%，較2019年64.6%少24.4個百分點；認為市民意見對政府政策有影響力嘅人就由2019年33.8%，升至2022年嘅39.3%。