【Emily】銀杏館深水埗開舖 10元歎晚市小菜

【明報專訊】今時今日喺香港仲可以用2元買到早餐、8元食晏、10元食到晚餐？關注長者就業嘅銀杏館會喺深水埗醫局街開間銀杏冰室，早午市做社區飯堂，晚市亦有10元小菜，等基層市民以實惠價錢食飽飯。銀杏館行政總裁麥敏媚同Emily講，冰室會喺星期五正式營業，先做早午市，下星期再開放晚市；而揀深水埗開社區飯堂，係考慮到呢區有唔少單身長者、劏房戶同無家者等基層，有較大嘅社區需求。

雖然主要服務對象係基層，但麥姑娘話，冰室唔會限制便宜飯菜嘅受惠人群，歡迎所有人光臨，「豐儉隨喜」。佢又話，冰室嘅菜式都好豐富下，客人可以用2元買到一個甜餐包、10元食到一份香醬魚，亦都可以揀「廚師精選套餐」，日日唔同款，價錢則介乎48至68元，晚市部分菜式種類同定價同坊間食肆差唔多，相信咁樣可以一定程度平衡番收支。麥姑娘仲提到，銀杏冰室會聘請長者掌勺，以協助長者就業。