【Emily】工聯五一探工友 勞聯促改善職安

【明報專訊】噚日五一勞動節，工聯會領導除咗邀官員探訪工人，工聯會嘅立法會議員都要身體力行落區。其中陸頌雄聯同汽車交通運輸業總工會九巴分會去咗多個巴士站，為車長及工友送上茶點打氣；陸其後同香港鐵路工會聯合會代表去到電車廠探訪工友，話感謝工友們嘅辛勞付出。黨友鄧家彪亦同陸頌雄一齊噚日朝去咗港鐵九龍灣港鐵車廠，同維修保養工程人員交流。

工聯會陳穎欣話，工聯會今年首次舉行「五‧一」勞動周系列活動，佢聯同黨友梁子穎等人去石籬邨探訪清潔工友，了解佢哋嘅工作情况。

勞聯立法會議員就喺社交媒體發表勞工節感言。勞聯林振昇話， 希望政府持續着力推動改善職業安全及健康，讓打工仔女可以安全地工作，安心為追求美好生活而拚搏，同時希望當局加強推動家庭友善僱傭措施，鼓勵僱主推行彈性工作。勞聯周小松就期望政府要堅守「本地工人優先就業」原則，保障本地工友就業機會。