【Emily】改編真事 工權會話劇推廣職安 本月設兩業界專場 市民可網上報名

【明報專訊】近年有唔少嚴重或奪命工業意外，引起社會對職安健嘅關注，工業傷亡權益會舊年將一宗奪命工傷同家屬追討公道嘅真人真事，改編成為《顧己及人》職安話劇，一直喺多間學校巡演，今個月就特設兩場業界專場畀建築界、教育同社福界觀賞，推廣職業安全意識。

話劇改編自一宗奪命工傷，2012年8月28日23歲搭棚工阿球，從擎天半島60樓單位墮下身亡，佢嘅哥哥其後為細佬奔走尋找真相同追討公道，結果發現各種荒謬，發現唔少人都推搪責任。觀眾喺短短45分鐘嘅話劇可以認識何謂安全嘅吊棚、樓宇不良設計點樣影響日後維修、業主外判工程唔等於外判責任。話劇希望令大家思考，安全其實係所有人嘅責任，只要每個人多走一步，就能挽回多一條寶貴生命。

職安話劇由香港話劇團演出，至今舉辦咗超過20場，4月15日同29日分別係建築界、同埋教育及社福界專場，話劇後仲有座談會，有興趣市民可於網上報名（www.ariav.org.hk/drama）。

相關字詞﹕工傷 話劇 職安健 工業傷亡權益會