【Emily】入境處長都收「入境處」詐騙電話

【明報專訊】不時有市民收到假冒入境處嘅詐騙電話，入境處長郭俊峯最近親自拍片，提醒市民唔好上當。入境處噚日喺社交平台上載宣傳短片，片中郭俊峯一接到電話，先有段預錄語音話入境處即日起限制佢出入境，之後有講普通話嘅騙徒話係因為佢嘅身分證出現異常，郭俊峯表露處長身分，反問騙徒知唔知道假冒公職人員係嚴重罪行，對方隨即「cut線」，搞到處長都好無奈：「又有邊個估到，入境處長都會收到偽冒入境處嘅詐騙電話呢？」

入境處提醒市民，收到可疑來電要問多兩句，除非有登記入境處嘅預約提示服務，否則入境處唔會用預錄語音致電市民，亦唔會飛線畀其他本地或外地機構接聽，如果市民有懷疑嘅話，可致電入境處嘅查詢熱線2824 6111或者電郵[email protected]查詢。