【Emily】立會新春午宴致辭 梁君彥：23係港lucky number

【明報專訊】《基本法》23條立法諮詢下星期三（28日）完結，立法會噚日舉辦新春午宴，特首李家超等官員同行政會議成員都有出席。立法會主席梁君彥致辭時，雖然無提到23條立法，但就提到今年午宴適逢喺2月23日舉行，「23」肯定係香港嘅lucky number（幸運數字），又話最近議員一聽到「23」就心情振奮，努力為香港拼經濟、為民生謀發展。

梁君彥仲話「23」令佢聯想到舊年立法會同政府嘅足球比賽，保安局長鄧炳強著住「23」號球衣，最終政府打破立法會多年「不敗之身」，立法會喺比賽中以2比3落敗。不過，鄧炳強當時話著23號同23條立法無關，而係因為鍾意著23號球衣嘅籃球名宿米高佐敦。

立法會噚日邀請咗聖保祿天主教小學嘅中樂團，午宴前喺立法會大堂表演，演奏咗樂團喺香港青年音樂匯演得獎曲目《春到邊疆》，同埋家喻户曉嘅《喜洋洋》。梁君彥形容兩首樂曲將春回大地、春節嘅歡欣展現得淋漓盡致，學生又有機會一展所長，佢亦深深畀佢哋活力嘅表現同音樂才華所打動。