Emily Online | 首戰奧運港柔道女將王嘉莉：有觀眾加油更落力 冀「香港主場都係咁」 (21:13)

2024巴黎奧運嘅賽事進行得如火如荼，噚晚張家朗同何詩蓓嘅決賽，Emily都睇到嗌埋出嚟！不過除咗佢哋，其他香港運動員可以參加到奧運𠵱個世界級賽事都好犀利！噚日立法會議員鄭泳舜就喺巴黎嘅街頭，訪問咗港隊柔道代表王嘉莉同細佬王嘉祺。

首次參加奧運嘅王嘉莉上星期六喺柔道女子48公斤以下級別嘅32強賽事入面，不敵奧地利選手坦莎（Katharina Tanzer），佢話心情已經平伏。回憶番場比賽，王嘉莉覺得今次喺法國感受到比賽氣氛非常好，當聽到觀眾叫佢「加油」，可以令佢「落力啲」、「好想嬴」，仲話法國隊嘅代表因為有現場觀眾支持，由以往「強」變到「好強」，甚至「愈打愈強」，希望𠵱種由觀眾帶嚟嘅氣氛，可以喺「香港主場都係咁」。

王嘉莉又話，對比之前要搶分嘅比賽，佢覺得奧運反而無咁緊張同有壓力，可以「Enjoy」場比賽，所以今場比賽發揮較之前好，過去幾個月嘅訓練、應付對手嘅方法都做到出嚟，「雖然最後結果唔係咁理想，但我哋都盡咗力，希望下次做得更加好畀大家睇！」。鄭泳舜就話「入得嚟（奧運）已經係世界級」，仲叫細佬王嘉祺下屆奧運「唔好只係打氣，親自落去打埋一份」。