【Emily】楊潤雄話考慮再買奧運轉播權

【明報專訊】巴黎殘奧噚日閉幕，文體旅局長楊潤雄話，今年政府買入奧運轉播權畀市民免費睇直播，「睇得到效果」，亦真真正正畀到精英運動員鼓勵，會盡快考慮點樣處理下屆洛杉磯奧運嘅轉播權。佢早前去咗法國觀賽，話殘奧競賽氛圍好，而賽事利用好多當地著名地點改造成比賽場館，做到旅遊同體育結合，值得香港參考。

啟德體育園即將落成，香港明年底同廣東及澳門合辦全運會，部分項目會喺園內舉行。楊潤雄喺《港台體壇123》同主持人、立法會議員鄭泳舜講，體育園預料年底大致完工，3個場館會分階段喺今年第四季起做場地測試。佢期望下年3月正式營運時已汲取經營經驗，以應付全運會。

兩萬人報名做全運義工 超額一倍

楊潤雄又話正全力籌備全運會，包括同粵澳政府商討喺資訊系統同過關上配合，不過由於三地制度唔同，要完全融合有一定挑戰。佢又提到政府招募緊全運會香港賽區義工，截至噚日，第一階段已有約兩萬人報名，超出原先一萬人目標，篩選後就會開始培訓。