【Emily】中秋維港無人機開騷 大坑火龍路線擴

【明報專訊】旅發局首個中秋主題無人機表演將喺中秋節（17日）夜晚8點上演，歷時10分鐘，1000架無人機將會喺灣仔海濱上空呈現多幅具中秋意境嘅動態畫面，包括玉兔、燈籠、月餅、火龍等。另外，大坑舞火龍會喺下星期一起一連3晚（16至18日）舉行，16日及18日嘅時間係夜晚7點半至10點半，而17日中秋正日就係夜晚7點半至11點半。

今年嘅大坑舞火龍表演範圍將由浣紗街伸延去到銅鑼灣道，亦會增加定點表演區同維園直播專區，希望吸引更多市民遊客參與，其中中秋夜嘅表演會由10點半起移至維園舉行。除咗傳統火龍，約100個小朋友會合力舞動長約20米、由約1萬粒LED燈點亮嘅小火龍，象徵傳統習俗傳承。盛會亦首次引入花式跳繩同熒光雙節棍等表演。