【Emily】倡設司機投訴乘客機制 的士業稱公平啲

【明報專訊】的士司機違例記分制生效逾一個星期，一名司機上周五被記10分。有業界代表認為機制對不良現象有阻嚇之效，同時建議強制安裝車內攝錄系統，同埋設立機制，允許司機投訴乘客，「對司機而言比較公平」。

汽車交通運輸業總工會的士司機分會主任何志強噚日喺港台節目《千禧年代》話，應設乘客投訴機制及強制安裝車內攝錄系統，「香港像投訴之都，如果雙方都可以投訴，對司機而言比較公平」。政府早前亦表示，考慮強制所有的士必須喺車廂內安裝攝錄系統，現正研究建議可行性，計劃今年內諮詢業界意見。

何志強舉例，乘客想去A點，但司機知道附近有交通意外，提議「不如兜遠啲，行快啲嗰條路」，乘客即使答應，但去到目的地「乘客唔順氣，畀咁多錢喎」，於是就投訴司機，「變咗雞同鴨講」，所以希望設立雙方都可投訴嘅機制。

的士司機違例記分制9月22日起生效，一名的士司機被法庭裁定干犯相關表列罪行，分別係濫收車費、兜客及沒有將的士計程表設定於紀錄位置。